Пловдив утрово осамна под полициска блокада по тешкото убиство на 53-годишниот Илијан Филипов, познат бугарски претприемач и сопственик на фудбалскиот клуб „Ботев“ Пловдив. Филипов бил застрелан во текот на ноќта, а полицијата веднаш започнала широка истрага и проверки низ градот.
Сигналот за пукањето бил пријавен околу еден часот по полноќ во пловдивската населба „Христо Смирненски“. На местото било констатирано дека Филипов починал од огнена повреда. Според досегашните информации, тој бил убиен во имот што бил во негова сопственост.
По пријавувањето на случајот, во акцијата се вклучиле екипи на пловдивската полиција и Главната дирекција „Национална полиција“. Влезно-излезните сообраќајници биле ставени под засилена контрола, додека полицијата спроведува проверки и собира информации поврзани со движењето на можниот сторител.
Од обвинителството и полицијата засега нема потврда дека убиството било дело на професионален убиец. Надлежните велат дека се проверуваат сите можни верзии, а меѓу нив е и можноста да станува збор за нарачано убиство. Во раната фаза од истрагата, сепак, нема официјално потврден мотив ниту осомничено лице.
Филипов беше едно од позначајните имиња во деловните кругови во Пловдив. Тој беше основач и раководител на „ПИМК“, компанија со силно присуство во транспортниот сектор, која со текот на годините го проширила работењето и во градежништвото и други области.
Неговото име беше тесно поврзано и со фудбалскиот клуб „Ботев“ Пловдив. Филипов беше сопственик на клубот, а неговиот бизнис беше поврзан и со изградбата на стадионот „Христо Ботев“, познат како „Колежа“.
Истрагата продолжува, а полициските и обвинителските тимови собираат материјални докази, проверуваат информации и разговараат со можни сведоци. Надлежните најавуваат дека дополнителни детали ќе бидат објавени откако ќе има потврдени информации.
Засега останува отворено прашањето кој стои зад убиството на влијателниот пловдивски бизнисмен и што бил мотивот за нападот.
Веста ја пренесува 4news.mk
