Тешка сообраќајна несреќа што во текот на ноќта се случила на патниот правец Охрид–Кичево заврши со трагичен епилог. Во несреќата животот го загуби 33-годишниот Антонио Савески, тренер во младинската школа на кошаркарскиот клуб Ангели.
Савески потекнувал од Охрид, каде што ги направил првите чекори во кошарката, а подоцна своето знаење и искуство им го пренесувал и на младите кошаркари. Дел од својата тренерска кариера ја поминал и во школата на Водно Партизан, каде што работел со млади и перспективни таленти.
Покрај ангажманот во кошарката, тој бил познат и по својата голема љубов кон спортот и спортските реквизити. Савески бил страствен колекционер на кошаркарски дресови, а неговата колекција броела околу 500 примероци.
Според првичните информации од Министерството за внатрешни работи, несреќата се случила откако автомобилот со кој управувал Савески удрил во кучиња скитници. По ударот, возилото излетало од патот и се забило во металните заштитни браници, по што избувнал пожар.
Несреќата остави зад себе голема тага меѓу неговите блиски, но и во кошаркарската заедница, каде што Савески беше активен во работата со најмладите.
Веста ја пренесува Newz24live.com
