Фото: ДЗС
По неколкудневната деноноќна борба со пожарот во Мариово и напорите за заштита на селата, дел од доброволните пожарникари искористија краток момент за одмор во базата во манастирот „Св. Ѓорѓи“ кај селото Дуње.
Од Дирекцијата за заштита и спасување (ДЗС), споделија фотографии од условите во кои пожарникарите го минуваат времето помеѓу две интервенции.
По ноќното и утринското дејствување, пожарникарската опрема и чизмите се сушат, додека пожарникарите се обидуваат да се одморат и да соберат сили за продолжување на активностите.
На располагање имаат она што го има во залихите, а меѓу скромните оброци е и домашна супа што самите ја подготвиле.
И водата за туширање се загрева на едноставен начин – шишињата се наредени на ѕидот за да ги грее сонцето, па пожарникарите да имаат барем млака вода за освежување по часовите поминати на терен.
