Унгарија е потресена од тешка сообраќајна трагедија во која животот го загубија 12 лица, откако туристички автобус излетал од автопат и се превртел во близина на Мезекерестеш.
Несреќата се случила во текот на ноќта, околу еден часот по полноќ, на автопатот М3 во источниот дел на земјата. Според досегашните сознанија на унгарската полиција, автобусот патувал кон Њиреѓхаза, кога од засега неутврдени причини го напуштил коловозот и завршил превртен во ендек.
Како една од можните причини за несреќата се разгледува и заморот, односно можното заспивање на возачот зад воланот. Тој бил приведен по несреќата, но истрагата сè уште трае и ова засега не претставува конечен заклучок на надлежните органи.
Во автобусот имало 57 патници и двајца возачи. Станувало збор за полски државјани кои се враќале од аџилак во Босна и Херцеговина.
Билансот од несреќата е трагичен – 12 лица го загубиле животот, а најмалку десет патници се повредени. Дел од нив останале заробени во тешко оштетеното возило, поради што спасувачките екипи имале исклучително тешка задача.
Пожарникари, полицајци и медицински тимови веднаш пристигнале на местото. Повредените биле извлекувани од автобусот преку прозорците, додека била употребена и специјална механизација за да се овозможи пристап до најтешко достапните делови од возилото.
По трагичниот настан, се активирале и полските дипломатски служби. Полскиот министер за надворешни работи Радослав Шикорски соопштил дека конзуларните претставници се во контакт со унгарските власти и дека се следи состојбата.
Истрагата продолжува, а надлежните треба да утврдат што точно довело до излетувањето на автобусот од патот. Полицијата засега го третира можното заспивање на возачот како првична верзија на настаните, додека конечната причина ќе биде позната по завршувањето на истрагата.
Веста ја пренесува Bbc.com
