Загриженост владее меѓу туристите и локалното население откако на неколку популарни плажи беше воведена привремена забрана за капење поради лош квалитет на морската вода. На ризичните локации се поставени црвени знамиња, а надлежните апелираат никој да не влегува во морето додека не се добијат нови резултати од анализите.
Според официјалните информации, испитувањата покажале дека водата на одредени капалишта не ги исполнува пропишаните здравствени стандарди. Забраната засега важи за делови од плажата Жукотрлица во Шушањ кај Бар, како и за плажите „Словенска плажа 01“ и „Пржно“ во Будва. Ограничувањето ќе остане во сила сè додека новите анализи не потврдат дека морето повторно е безбедно за капачите.
Проблемот се појавил откако биле пријавени заматена вода и непријатна миризба во близина на една од плажите, по што биле започнати дополнителни контроли. Локалните медиуми објавија дека постои сомнеж за излевање на отпадни води во морето на најмалку две локации, а институциите продолжуваат да ја испитуваат целата ситуација.
Во меѓувреме, расте загриженоста кај родителите кои со своите деца престојуваат на летување. Според информациите од локалните медиуми, амбулантите бележат зголемен број деца со слични симптоми, меѓу кои најчести се дијареја, повраќање, покачена телесна температура и изразена малаксаност.
Педијатрите предупредуваат дека во текот на летните месеци, особено во плитките делови од морето, може да се размножат бактерии кои претставуваат ризик за здравјето, а опасноста дополнително се зголемува доколку дојде до загадување или излевање на канализација.
Надлежните служби најавија дека ќе продолжат со редовен мониторинг на квалитетот на морската вода, а забраната за капење ќе биде укината само кога анализите ќе покажат дека условите повторно се безбедни. До тогаш, туристите и граѓаните се повикуваат да ги почитуваат предупредувањата и поставените црвени знамиња за да се избегнат можни здравствени последици.
Веста ја пренесува Direktno.rs
