Тешка сообраќајна несреќа ја потресе Романија откако минибус во кој патувале членови на вториот тим на Динамо Букурешт завршил во дрво. Во несреќата едно лице го загубило животот, а уште десетмина биле повредени.
Според првичните информации, 83-годишниот возач додека управувал со возилото добил срцев удар, по што изгубил контрола над минибусот и излетал од коловозот. Возилото со голема сила удрило во дрво, предизвикувајќи тешки последици.
Во минибусот имало вкупно 16 лица. На местото на несреќата починал членот на медицинскиот тим на клубот, Константин Ковачиу. Повредените веднаш биле згрижени од итните служби и транспортирани во болница.
Од клубот информираа дека фудбалерите и стручниот штаб се во стабилна состојба и немаат повреди опасни по живот. Тренерот на вториот тим, Адријан Ропотан, се здобил со скршеници на двете раце.
Динамо Букурешт упати порака на сочувство до семејството на Ковачиу, нагласувајќи дека тој долг период бил дел од медицинската екипа на клубот и оставил значаен белег во тимот.
Надлежните органи започнаа истрага за да се утврдат точните причини за несреќата.
Веста ја пренесува Vecer.mk
