Шпанската енклава Сеута се соочува со сериозна миграциска криза, поради што локалните власти прогласија апсолутна миграциска вонредна состојба. Во изминатите денови нагло се зголеми бројот на мигранти кои од територијата на Мароко се обидуваат да влезат во Европската Унија преку оваа енклава.
Според информациите од терен, денеска илјадници мигранти успеале да ја пробијат граничната ограда, додека претходно голем дел од нив пристигнувале препливувајќи го морскиот премин. Поради силниот прилив, прифатните центри се исполнети до максимум, а дел од новодојдените останале без соодветни услови за сместување.
Претседателот на локалната влада, Хуан Хесус Вивас, побара од шпанската влада да прогласи национална вонредна состојба и итно да распореди дополнителни полициски и воени сили за зајакнување на контролата на границата и справување со миграцискиот притисок.
Локалните власти наведуваат дека во последните десетина дена во Сеута пристигнале меѓу 1.500 и 2.000 мигранти, бројка што изнесува околу два проценти од вкупното население на енклавата. Меѓу новопристигнатите има и значителен број малолетни лица, што дополнително ги усложнува хуманитарните и безбедносните предизвици.
Веста ја пренесува Premiernews.mk
