Седумнаесетгодишно момче е повредено откако се обидело нелегално да скокне од карпите на познатата локација „Сансет Клифс“ во Сан Диего, но наместо во водата, удрило во карпест дел под работ на литицата.
Несреќата се случила во саботата попладне, околу 16:30 часот, кога младиот човек се затрчал и скокнал кон морето пред погледите на бројни посетители. Дел од присутните го снимале моментот со мобилните телефони, но наместо успешно приземјување во водата, момчето силно удрило во карпите, а потоа паднало во морето.
Очевидци веднаш реагирале. Најмалку шест лица без двоумење влегле во водата за да му помогнат и да го извлечат од силните бранови, додека на местото на настанот брзо пристигнале пожарникари, спасувачи и медицински екипи. Со специјализирана спасувачка опрема, повредениот бил извлечен на безбедно и пренесен во болница.
Според првичните информации, момчето било свесно за време на интервенцијата, но засега не се соопштени детали за сериозноста на неговите повреди.
Локалните власти потсетуваат дека скокањето во морето од високи карпи е строго забрането. На „Сансет Клифс“ се поставени бројни предупредувачки табли поради нестабилниот терен и карпите што се наоѓаат веднаш под површината на водата. И покрај тоа, дел од посетителите и понатаму ги игнорираат предупредувањата и се изложуваат на сериозен ризик.
Надлежните повторно апелираат до граѓаните да не се обидуваат со вакви опасни скокови, нагласувајќи дека овој инцидент можел да има многу потрагичен исход.
Веста ја пренесува Senzacija.ba_
