Трагичен настан во американската сојузна држава Флорида ја вознемири јавноста, откако видео од безбедносни камери ги откри драматичните моменти што му претходеле на смртниот исход на 47-годишниот Мелвин Хименез.
Според информациите од обвинителството, инцидентот се случил во марина во Рускин, каде 52-годишниот Камал Падловски, по жестока расправија, го оттурнал Хименез. При падот, жртвата силно ја удрила главата и останала беспомошна.
Наместо да му укаже помош или да алармира итна медицинска служба, осомничениот, како што наведуваат обвинителите, го влечел Хименез за нозете до работ на пристаништето, а потоа го турнал во водата. Обдукцијата покажала дека причината за смртта била давење.
Истрагата утврдила дека двајцата се запознале истиот ден во локален бар, каде заедно пиеле алкохол, по што заминале на бродот на Падловски. Снимките од надзорните камери одиграле пресудна улога во судската постапка, бидејќи, според обвинителството, јасно го прикажуваат текот на настаните и улогата на обвинетиот.
Поротата во Флорида го прогласи Камал Падловски за виновен за убиство од прв степен. Тој пред судот тврдеше дека постапувал во самоодбрана, но судиите не ја прифатија неговата верзија. Изрекувањето на казната е најавено за август, а обвинетиот се соочува со можност да добие доживотен затвор.
Веста ја пренесува Podzemje.mk
