Спорната интервенција на водоснабдителниот систем во Гостивар била реализирана без претходна согласност од Министерството за животна средина и просторно планирање, потврди директорката на Државниот инспекторат за животна средина, Ивана Гиновска.
Таа појасни дека според важечката дозвола, секоја промена на водоснабдителната мрежа мора однапред да добие одобрение од Управата за животна средина, односно од Секторот за води. Сепак, во овој случај такво барање воопшто не било поднесено.
Гиновска нагласи дека приклучокот кој сега е предмет на истрага не бил предвиден во издадената документација и бил поставен на околу еден километар од последната точка опфатена со дозволата. Околностите под кои е изведен зафатот, како и начинот на кој загадената вода влегла во системот за водоснабдување, ќе ги утврдуваат Крим-полицијата и Јавното обвинителство.
Во меѓувреме, Агенцијата за храна и ветеринарство продолжува со дополнителни анализи на водата, при што се земени примероци од повеќе точки низ Гостивар. Директорот на АХВ, Оливер Миланов, изјави дека забраната за користење на водата од системот на ЈП „Комуналец“ останува во сила сè додека лабораториските резултати не потврдат дека таа е исправна и безбедна.
Тој апелираше граѓаните да не ја користат водата за пиење, подготовка на храна и пијалаци, туку да обезбедат друг извор на технички исправна вода сè до добивањето официјално известување од надлежните институции.
Основното јавно обвинителство во Гостивар веќе води истражна постапка против три лица – вршителката на должноста директорка на ЈП „Комуналец“, техничкиот раководител на Секторот за технички работи и раководителот на Одделението за водовод, канализација и градежни работи.
Според сомневањата на обвинителите, на 25 јуни тие дале наредба да се постават три потопни пумпи во канал со површинска вода, по што во водоводната мрежа била внесена вода загадена со колиформни бактерии. Анализите покажале микробиолошка неисправност на водата за пиење, како и концентрација на резидуален хлор над дозволените вредности.
Осомничените се приведени, а Обвинителството ќе одлучи дали ќе предложи дополнителни мерки за нивно обезбедување. Истрагата за случајот продолжува и треба да ги утврди сите околности и евентуалната одговорност.
Веста ја пренесува Skopje1.mk
