Надлежните институции го потврдија идентитетот на трите лица кои беа пронајдени починати во превртен автомобил во близина на Граничниот премин Блаце. Станува збор за Ејуп Тернава, Џенет Тернава и Фатмире Шабани, за кои претходно беше пријавено дека се исчезнати.
Од Министерството за внатрешни работи информираат дека на 19 јули 2026 година, во 22:35 часот, во СВР Скопје била примена пријава за сообраќајна несреќа на патниот правец од Граничниот премин Блаце кон Скопје, каде било забележано превртено возило „Мерцедес“ со германски регистарски таблички.
Полициски екипи веднаш излегле на местото на настанот, при што во возилото биле затекнати три лица без знаци на живот – еден маж и две жени. Лекарска екипа од Итната медицинска помош ја потврдила нивната смрт.
Претходно истиот ден, околу 13:40 часот, во Полициската станица Бит Пазар, државјанин на Косово пријавил исчезнување на трите лица. Според неговата изјава, последната комуникација со нив била остварена вечерта на 18 јули, околу 22:15 часот, кога тие се наоѓале на Меѓународниот аеродром во Скопје.
Надлежните органи продолжуваат со истрагата за целосно утврдување на околностите што довеле до трагичниот настан.
Веста ја пренесува Press24.mk
