Тешката сообраќајна несреќа што се случи на Халкидики доби уште потрагичен епилог. Откако на местото на несреќата животот го загубија мајката и бебето, лекарите не успеаја да го спасат ниту таткото, кој им подлегнал на тешките повреди во болница.
Според информациите од грчките медиуми, семејството потекнувало од Молдавија. Во возилото патувале двајцата родители и нивните две малолетни деца кога дошло до силен судир со цистерна на регионалниот пат Полигирос – Агиос Николаос.
Несреќата се случила во средата попладне, а на терен веднаш интервенирале пожарникари кои со специјална спасувачка опрема ги извлекувале патниците од уништениот автомобил.
Мајката и бебето биле пронајдени без знаци на живот, додека таткото и другото малолетно дете биле извлечени со тешки повреди, главно во пределот на главата.
На местото на трагедијата пристигнале екипи на Итната медицинска помош, кои со повеќе амбулантни возила ги транспортирале повредените во Општата болница на Халкидики. Во болница бил пренесен и возачот на цистерната.
И покрај напорите на лекарскиот тим, таткото им подлегнал на повредите во Ургентниот центар. Единствениот преживеан член од семејството – малолетното дете – сè уште се наоѓа на болничко лекување. Возачот на цистерната е во стабилна здравствена состојба.
Надлежните служби од Сообраќајната полиција во Полигирос спроведуваат истрага за да ги утврдат причините и околностите што довеле до оваа трагична сообраќајна несреќа.
Веста ја пренесува Telegraf.rs
