Албанскиот премиер Еди Рама порача дека Албанија нема да го следи примерот на Бугарија и нема да издава албански пасоши на етничките Албанци во Северна Македонија по евентуалното членство на земјата во Европската Унија.
Одговарајќи на прашање од студент од Скопје дали Албанија некогаш би го блокирала европскиот пат на Македонија, Рама нагласи дека неговата земја нема намера да користи вето во процесот на проширување на Европската Унија.
Тој потсети дека отсекогаш бил против употребата на вето, оценувајќи дека тоа претставува механизам кој ги забавува евроинтеграциите и не носи корист за земјите што се стремат кон членство.
Рама истакна дека Албанија не може да постапува на начин што би ја нарушил кохезијата во европското семејство. Според него, Бугарија ја искористила својата позиција дури откако станала членка на Европската Унија, кога добила поголемо политичко влијание преку членството.
Тој повтори дека ставот на Албанија останува непроменет – европската интеграција треба да се гради преку соработка, меѓусебно разбирање и дијалог, а не преку блокади или други потези што можат да го отежнат патот на земјите кандидати.
Веста ја пренесува Fokus.mk
