Апелациониот суд Скопје донесе одлука со која ги потврди најстрогите казни за обвинетите во случајот што ја потресе македонската јавност – убиствата на 14-годишната Вања Ѓорчевска и велешанецот Панче Жежовски.
Доживотните затворски казни за Љупчо Палевски, Велибор Манев, Боро Видевски и Влатко Кешишев остануваат во сила, откако второстепениот суд ги одби нивните жалби како неосновани.
Апелација ја потврди првостепената пресуда во делот со кој четворицата обвинети беа прогласени за виновни за грабнувањето и убиствата на Вања и Панче.
Во исто време, судот ја прифати жалбата на Основното јавно обвинителство Скопје во делот што се однесува на Александар Ѓорчевски, таткото на Вања. Укината е ослободителната одлука за обвинението за помагање при грабнувањето на неговата ќерка, а предметот е вратен на повторно разгледување пред Основниот кривичен суд Скопје.
Од Апелациониот суд информираат дека поради сложеноста на случајот и големиот број докази, изработката на целосната писмена одлука сè уште е во тек. По нејзиното завршување, документот ќе биде достапен на официјалната интернет-страница на судот.
Веста ја пренесува Skopje1.mk
