Галичник и годинава беше домаќин на една од најпознатите македонски културни манифестации – „Галичка свадба“, на која присуствуваше и претседателката Гордана Сиљановска-Давкова. Настанот повторно се одржа под нејзино покровителство, собирајќи бројни посетители и љубители на македонските традиции.
При своето пристигнување, претседателката беше пречекана според старите галички обичаи – со домашна нафора и сол, а добредојде ѝ посакаа најмладите жители на Галичник. Таа ги следеше обредите што со генерации се зачувуваат во мијачкиот крај и претставуваат важен дел од македонското нематеријално културно наследство.
По црковниот чин на венчавање во храмот „Свети Петар и Павле“, Сиљановска-Давкова им се придружи на младенците и гостите во традиционалното свадбарско оро, со што ја збогати атмосферата на свеченоста.
Како спомен на овој посебен ден, претседателката им врачи традиционална галичка пафта на младенците Мартина Михајлова и Александар Пендароски. Станува збор за препознатлив украс од галичката носија, кој се смета за симбол на плодноста, семејната среќа и богатата македонска свадбена традиција.
Во своето обраќање, таа им упати искрени желби за долг и среќен заеднички живот, исполнет со љубов, доверба и заемна почит, посакувајќи нивниот дом да биде место на разбирање, благосостојба и радост.
Свеченостите започнаа уште на 10 јули со традиционалното кревање на свадбарското знаме и обичајот на испукување три пушки од домот на зетот, со што симболично беше означен почетокот на свадбените денови.
„Галичка свадба“ и оваа година ја потврди својата репутација како една од најзначајните културни манифестации во Македонија, привлекувајќи голем број домашни и странски посетители кои сакаат одблизу да ги доживеат автентичните македонски свадбени обичаи.
Веста ја пренесува Kurir.mk
