Невремето што го зафати главниот град предизвика сериозни проблеми на Клиниката за онкологија, каде што беше поплавен делот во кој се спроведуваат третмани со радиотерапија за пациенти со малигни заболувања.
Директорот на Клиниката, Игор Стојковски, потврди дека веднаш по инцидентот биле исклучени сите апарати за да се спречи каков било дополнителен ризик.
„Сите уреди беа навремено ставени надвор од функција“, изјави Стојковски.
Според информациите, во моментот кога дошло до поплавата, една пациентка се наоѓала на третман со јод, поради што било отежнато нејзиното извлекување од просторијата.
Од Клиниката информираат дека се во постојана координација со Агенцијата за радијациона сигурност и нагласуваат дека нема пациенти чие здравје е загрозено поради настанатата состојба.
Пациенти кои биле присутни во установата сведочат дека по ходниците биле поставени ќебиња и чаршафи со цел да се впие водата и да се олесни санирањето на последиците од поплавата.
Според нивните тврдења, дел од присутните биле видно вознемирени, а еден пациент бурно реагирал и упатувал закани кон медицинскиот персонал поради прекинот на работата.
Поплавата, според досегашните информации, е последица на силното невреме што го погоди Скопје. Засега нема официјални податоци за висината на материјалната штета.
Веста ја пренесува Skopje1.mk
