Страшна семејна трагедија ја потресе северна Грција, откако во голем шумски пожар животот го загубија татко и неговиот малолетен син, додека мајката се здоби со повреди и е згрижена во болница.
Според информациите на грчките медиуми, меѓу кои и „Катимерини“, загинатиот е 66-годишен маж. Неговото тело било пронајдено во дворот на семејната куќа, а подоцна спасувачките екипи во домот го откриле и телото на неговиот 12-годишен син.
Пожарот избувнал вчера околу пладне во предел со ниска вегетација кај Дервени, во општината Ореокастро, северозападно од Солун. Поттикнат од силниот ветер, огнот за кратко време се проширил кон селото Лити и околната борова шума, што значително ја отежнало интервенцијата на противпожарните екипи. Поради сериозната опасност, бил активиран и системот за итни известувања 112.
Грчките власти наредиле итна евакуација на жителите на Лити, населба со околу 4.000 жители, кои биле префрлени на безбедна локација, на локалниот спортски терен.
Мајката на загинатото момче била пронајдена повредена и веднаш пренесена во болница во Солун. Според првичните информации, таа има повреди претежно на рацете и нејзината состојба не е животозагрозувачка.
Надлежните служби продолжуваат со истрагата за околностите под кои се случила трагедијата, додека пожарникарите и понатаму се борат со огнената стихија во погодениот регион.
Веста ја пренесува Slobodenpecat.mk
