Македонската музичка сцена продолжува да се простува од Владо Јаневски, а бројни негови колеги и пријатели преку емотивни објави споделуваат спомени од заедничките години.
Меѓу нив е и Џина Папас Џокси, кој откри детали од нивното долгогодишно пријателство и првите чекори во музиката, потсетувајќи на периодот кога заедно ги граделе своите кариери.
Според неговите зборови, со Владо Јаневски се запознале уште во раните осумдесетти години, кога Владо и Роберт му понудиле да сними една нивна композиција за потребите на Македонското радио.
„Со задоволство ја отпеав песната, но не можев да станам дел од нивниот состав бидејќи во тој период заминував од Македонија“, раскажува Џокси.
Тој се присети дека во тие години со Владо често поминувале време создавајќи музика, поради што пријателите ги нарекувале „Чаирските романтичари“. Како што вели, со гитарите во раце седеле на Камчето зад зградата и ги претворале своите идеи во песни.
По повторната средба во почетокот на деведесеттите, нивното пријателство продолжило и на професионален план. Владо тогаш настапувал со „Ластовица“, додека Џокси ја развивал својата соло кариера.
Еден од најдрагите спомени, како што открива, е од Интерфест во Битола во 1995 година, кога двајцата делеле иста хотелска соба за време на фестивалот.
Џокси истакнува дека подоцна, кога Владо започнал успешна самостојна кариера, станал значително поповлечен и целосно посветен на музиката, што, според него, му донело заслужен успех и трајно место на македонската музичка сцена.
Тој сподели и фотографија направена во 2010 година на улица Македонија, на која се заедно со Владо и Роберт, посочувајќи дека тоа била нивната последна средба.
„Почивај во мир, Владо. Ќе живееш преку твоите песни и спомените што ги остави зад себе“, напиша Џокси во својата проштална порака.
Веста ја пренесува Crnobelo.com
Објава: Џина Папас Џокси
