Жена од струшко село се соочува со кривична пријава поради сомнение дека сторила кривично дело „запуштање и малтретирање дете“, откако своите две малолетни деца ги оставала сами да преноќуваат во автомобил додека таа била на работа.
Според информациите од Министерството за внатрешни работи, случајот бил откриен во ноќта меѓу 8 и 9 јуни 2026 година. Полициски службеници, постапувајќи по насоки на јавен обвинител, извршиле проверка и на земјен паркинг на улицата „Владо Малески“ во Струга ги пронашле двете деца како спијат во паркираното возило.
Од ОВР Струга соопштија дека против 42-годишната Н.С. е поднесена кривична пријава поради основано сомнение за сторено кривично дело „запуштање и малтретирање дете“ согласно член 201, став 1 од Кривичниот законик.
Според полициските информации, жената во повеќе наврати ги оставала децата сами во автомобилот додека ги извршувала своите работни обврски. За случајот е известено надлежното јавно обвинителство, кое ќе ја води понатамошната постапка.
Веста ја пренесува Slobodenpecat.mk
