Фото: Принтскрин
Полицијата приведе четири лица во рамки на истрагата за убиството на 48-годишна жена, чие тело беше пронајдено во близина на скопското село Летевци.
Според информациите од Министерството за внатрешни работи, во раните утрински часови на 28 јуни бил уапсен С.Г. (51) од село Таор, поради сомнение дека го сторил кривичното дело убиство.
Истрагата покажала дека осомничениот на 26 јуни пријавил во полиција дека жената, со која живееле во ист дом, се оддалечила од домот. Еден ден подоцна тој повторно се обратил во полицијата, тврдејќи дека ја пронашол почината во близина на селото Летевци.
На местото веднаш излегле полициски екипи и јавен обвинител, кои извршиле увид. Телото, кое било во напредна фаза на распаѓање, по наредба на обвинител е предадено на обдукција во Судска медицина, со цел да се утврдат точните причини за смртта.
По извршениот разговор со осомничениот, тој бил лишен од слобода. Во текот на истрагата биле приведени и уште три лица – З.М. (62), Г.Б. (64) и М.Д. (69), кои се поврзуваат со случајот.
Од Обвинителството и МВР информираат дека истрагата е во тек и дека се преземаат сите неопходни мерки за целосно расчистување на настанот.
Веста ја пренесува Newz24live.com
