Претседателката Гордана Сиљановска-Давкова вчера на свеченост во „Вила Водно“ постхумно ја одликуваше историчарката Наде Проева со Орден „8 Септември“, во знак на признание за нејзиниот исклучителен придонес во развојот и меѓународната афирмација на македонската историографија.
Во своето обраќање, претседателката истакна дека со ова високо државно одликување се оддава почит на една од највлијателните личности во македонската историска наука, чија работа била препознаена и ценета и надвор од границите на државата.
Таа нагласи дека делата на Проева се значајни не само поради новите научни сознанија што ги донеле, туку и поради нивната посветеност на фактите, истражувањето и аргументираниот научен пристап. Според неа, Проева оставила длабока трага во научната јавност преку своите книги, студии и преку уредувањето на значајни научни едиции посветени на античката и византиско-македонската историја.
Сиљановска-Давкова потсети дека Проева не била само научник затворен во академските кругови, туку и активен учесник во јавниот живот. Таа сметала дека интелектуалците имаат обврска да се вклучуваат во дебатите за културата, историјата и националниот идентитет, а нејзините јавни настапи и колумни оставиле силен впечаток во македонското општество.
Претседателката сподели и лични сеќавања за нивното долгогодишно пријателство, опишувајќи ја Проева како исклучително љубопитна, храбра и принципиелна личност, со огромно знаење и аналитички дух.
Орденот во име на семејството го прими нејзината сестра, Павлина Проевска.
Во рамките на настанот беше прикажан и документарниот биографски филм „Наместо хагеографија“, посветен на животот, делото и научното наследство на Наде Проева.
Веста ја пренесува Makfax.com.mk
