Европратеничката од Словенија, Ирена Јовева, во Европскиот парламент истакна дека Македонија не смее да биде жртва на внатрешни политички тензии и незадоволства на други земји.
Таа зборуваше за време на дебатата за извештајот за напредокот на државата кон Европската Унија, нагласувајќи дека документот треба да се задржи на суштинските прашања – реформите, владеењето на правото и реалниот напредок на земјата кон членство.
Според неа, во ваквите извештаи нема место за теми како што се идентитетските прашања, јазикот или различни историски толкувања, бидејќи тие го одвлекуваат вниманието од вистинските критериуми.
Јовева порача дека Европската Унија е проект на заедничка иднина и соработка меѓу народите, а не инструмент за „потврдување на постоењето на нации“.
Таа исто така предупреди дека Европскиот парламент не треба да создава дополнителни поделби или да ги претвора извештаите во политички натпревар меѓу државите.
„Македонците не се на испит. Европа е“, истакна Јовева, додавајќи дека оценувањето на земјите-кандидатки мора да се базира исклучиво на реални реформи и објективни стандарди.
Веста и видеото ги пренесува 24chasa.mk
