По пронаоѓањето на безживотното тело на 20-годишно момче кај „Машка плажа“ во Охридското Езеро, градоначалникот на Струга, Менди Ќира, доставил иницијатива до Советот на општината со цел зголемување на безбедноста на плажите.
Во предложените мерки се предвидува воведување построга контрола и забрани кои би требало да спречат натамошни ризици и злоупотреби на крајбрежјето. Според Ќира, една од клучните промени е забрана за движење и паркирање на педалинки во делови од плажите.
Тој посочува дека дел од овие пловила се користат без соодветни дозволи, а често и без издавање фискални сметки, што отвора простор за нелегално работење и недоволна безбедност на посетителите.
Дополнително, градоначалникот истакнува дека постои проблем и со узурпација на просторот, каде што, според него, неретко се поставуваат лежалки и друга опрема без контрола и одобрение.
Иницијативата предвидува и плажите да се уредуваат и управуваат преку урбана опрема под надлежност на општината, наместо преку диво изградени и нерегулирани објекти.
Целта, како што наведува Ќира, е воведување поголем ред, подобра контрола и зголемена безбедност за сите посетители на езерските плажи.
Веста ја пренесува Slobodenpecat.mk
