Бугарските медиуми објавија видео-снимка на која се гледа моментот кога маж се приближува до два автомобили паркирани пред Амбасадата на Бугарија во Скопје, истура запалива течност врз нив и потоа мирно се оддалечува од местото, без да покажува знаци на паника или брзање.
Според описот што го пренесува бугарската агенција БГНЕС, сторителот делува целосно смирено додека го извршува инцидентот, а во исто време се сугерира дека нема навремена реакција од присутните служби во близина. Во објавите се наведува и дека и покрај присуството на вработени од Министерството за внатрешни работи, реакцијата по избувнувањето на пожарот била задоцнета, а противпожарните екипи пристигнале дури подоцна, по обидите за гаснење од страна на дипломатскиот персонал.
Од македонското Министерство за надворешни работи и надворешна трговија остро го осудија настанот, истакнувајќи дека станува збор за сериозен и неприфатлив чин насочен кон имот на Амбасадата на Република Бугарија во Скопје.
Во меѓувреме, од Министерството за внатрешни работи информираат дека се преземаат сите потребни мерки за целосно расчистување на случајот, како и за утврдување на сите околности поврзани со инцидентот.
Веста и видеото ги пренесува Fokus.mk
