Дваесет и едногодишен жител на селото Батинци е лишен од слобода откако бил откриен како управува автомобил со екстремно висока брзина од 244 километри на час на автопатската делница Скопје–Гевгелија.
Според информациите од Министерството за внатрешни работи, на 13 јуни околу 20:00 часот, во близина на селото Милетково, полициски службеници од ОВР Гевгелија при сообраќајна контрола со радар утврдиле дека И.Р. (21) од Батинци управувал патничко возило „БМВ“ со скопски регистарски ознаки со брзина која речиси двојно ја надминува дозволената.
На оваа делница максимално дозволената брзина изнесува 120 километри на час, што значи дека возачот возел со 124 километри над дозволеното ограничување.
За настанот бил известен јавен обвинител од Основното јавно обвинителство Гевгелија, по чии насоки возилото било одземено.
По целосно документирање на случајот, против возачот ќе биде поднесена кривична пријава за „безобѕирно управување со моторно возило“ согласно член 297-а од Кривичниот законик.
Веста ја пренесува Skopje1.mk
