Лидерот на Демократската унија за интеграција (ДУИ), Али Ахмети, соопшти дека во наредниот период ќе се повлече од претседателската функција во партијата и дека ќе се вклучи во активностите на т.н. клуб на ветерани.
Во обраќање на изборното собрание на партискиот огранок во Куманово, тој истакна дека не планира да остане доживотно на чело на ДУИ.
„Нема засекогаш да бидам претседател на партијата. Сакам да им се приклучам на ветераните и од таа позиција да продолжам да придонесувам“, изјави Ахмети.
И покрај најавеното повлекување од лидерската функција, Ахмети нагласи дека нема да се повлече целосно од политичката сцена и дека и понатаму ќе биде активен во процесите поврзани со албанските политички интереси.
Тој во својот говор се осврна и на поранешни партиски кадри, меѓу кои и Садула Дураку, посочувајќи дека дел од нив ќе бидат вклучени во структурата на ветераните.
Оваа најава веќе отвори дебати за тоа кој ќе го наследи Ахмети на чело на ДУИ и како ќе се одвива транзицијата на лидерството во партијата. Политички аналитичари предупредуваат дека најголемиот предизвик ќе биде зачувувањето на единството во организацијата по заминувањето на долгогодишниот лидер.
Според информации од партиски извори, во последниот период се направени значајни промени во локалните структури, при што се заменети околу 73% од раководните позиции.
Веста ја пренесува Skopje1.mk
