Патувањето со Градскиот воз од Маџари до Транспортниот центар ќе трае само 5 минути, што е значително побрзо од сегашниот автобуски превоз кој на истата релација вози речиси половина час.
Утринското тест-возење го следеа претставници од двете железнички компании, МЖ Транспорт и Инфраструктура, кои со тоа ја проверија функционалноста на новата линија.
„Првата фаза од релацијата Зелениково – Скопје е завршена речиси до 90 отсто. Во моментов работиме на горниот строј, заменувајќи дотраените дрвени прагови со бетонски, а каде што е потребно, се поставуваат нови дрвени прагови, согласно условите на теренот. За другите две фази е во тек постапка за избор на проектант, а градежните активности планираме да започнат оваа есен“, изјави Ивана Бикоска од Јавното претпријатие за железничка инфраструктура.
Градскиот воз се очекува да започне со работа на 1 септември, со почетокот на учебната година. Од инфраструктурата уверуваат дека градежните работи ќе бидат завршени, но за целосна функционалност е потребна набавка на дополнителни возови. За првата линија возовите веќе се обезбедени, а за останатите две траси се очекува нивно пристигнување во наредниот период. Вкупно, на сите три траси ќе бидат потребни повеќе од 50 возови.
„Од септември, наутро ќе сообраќаат два воза, а потоа по еден. Во целост, планирано е секоја траса да има околу 18 возови, што значи вкупно 54 за сите три линии“, објасни Горанчо Јовановски, директор за патнички сообраќај.
Еколошките организации веќе дадоа предлози за подобрување на градскиот воз, нагласувајќи дека станиците треба да бидат пофункционални и пристапни за сите, вклучително и лица со попреченост. „Некои станици се недостапни и оддалечени од населени места. Можеби треба ЈСП да обезбеди транспорт до нив“, истакна Дарко Арсовски Петровски од „Гоу Грин“.
Во моментов, железничките линии од Скопје се протегаат до Велес, Гевгелија, Кочани и Кичево, според возниот ред на МЖ Транспорт.
Инаку, проблемите со железницата се долговремени. Претходно се дискутираше и за приватизација, а двете железнички компании се на врвот на листата на должници на Министерството за финансии, со неплатени обврски кои изнесуваат околу 80 милиони евра.
Веста и видеото ги пренесува Телма.мк
