Откриен е идентитетот на загинатите и тешко повредениот во сообраќајката кај Прилеп – Градско!

Идентитетот на двајцата загинати и на тешко повредениот во трагичната сообраќајна несреќа на експресниот пат Прилеп – Градско е веќе откриен. Во несреќата учествувале две возила со прилепски регистарски таблички, а повеќе детали објави Секторот за внатрешни работи Велес.

Според информациите од ОВР Кавадарци, во 13:30 часот денеска било пријавено дека на експресниот пат Градско – Прилеп, по исклучокот за Кавадарци, се случила сообраќајна несреќа меѓу патничкото возило „шкода октавија“ управувано од Ж.Р. (51) од Прилеп и „фолксваген голф“ управувано од Т.М. (39) од Прилеп.

На местото на несреќата загинале возачот на „шкода октавија“ и 42-годишната Б.Б., сопатник во истото возило, а смртта ја констатирала екипа на Итната медицинска помош од Кавадарци.

Возачот на „фолксваген голф“ се здобил со тешки повреди, кои биле првично констатирани во Општа болница Кавадарци, а потоа бил пренесен на понатамошно лекување во Комплекс клиники „Мајка Тереза“ во Скопје. Увид на местото извршил јавен обвинител заедно со екипа од ОВР Кавадарци, а сообраќајот бил целосно нормализиран околу 17:00 часот.

Веста ја пренесува Infomax.mk