Министерот за внатрешни работи Панче Тошковски најави нов пакет мерки за зголемување на безбедноста во сообраќајот, при што посебно внимание ќе биде насочено кон употребата на електричните тротинети и унапредувањето на системот „Сејф сити“.
Според него, во наредниот период ќе се интензивираат контролите на терен, а санкции ќе добиваат возачите кои непрописно паркираат или не ги почитуваат сообраќајните правила. Во подготовка се и законски измени кои ќе воведат построги услови за користење на електричните тротинети.
Тошковски истакна дека, доколку одлуката зависела исклучиво од него, би се заложил за целосна забрана на електричните тротинети во државата. Како причина ги наведе зголемениот број сообраќајни незгоди, повредени лица, тешки телесни повреди и човечки жртви поврзани со нивната употреба.
Сепак, конечната одлука нема да ја донесе Министерството за внатрешни работи, туку Собранието. Предлог-решенијата ќе бидат разгледани во поширока стручна дебата, во која ќе учествуваат и професори и експерти од соодветните области.
„Ќе се обидеме да дојдеме до најсоодветно законско решение. Сигурно е дека новите правила ќе бидат значително поригорозни од сегашните“, порача министерот.
Веста ја пренесува Канал 5 телевизија.
