Апелациониот суд ја потврди првостепената пресуда против поранешниот градоначалник на Општина Карпош, Стевчо Јакимовски, кој е осуден на една година затвор за кривичното дело бесправно градење.
Според соопштението од Основниот кривичен суд Скопје, Второстепениот суд ги разгледал жалбите поднесени и од Јакимовски и од Јавното обвинителство и донел одлука со која ја потврдува првичната пресуда за бесправното градење. Во казната му е пресметан и периодот во куќен притвор од 19 март до 15 август 2019 година.
Во врска со обвинението за злоупотреба на службената положба и овластувања, судот ја уважил жалбата на Јакимовски и овој дел од предметот е враќан на повторно судење. Судот предупредува дека, бидејќи делото се однесува на периодот од 2011 до 2017 година, а законската казна изнесува три до пет години затвор, постои ризик од застарување на предметот во текот на 2027 година.
Апелациониот суд исто така ја укинал условната осуда за обвинетиот Т.Ѓ., при што и овој предмет е вратен на повторно постапување.
Од Кривичниот суд информираат дека случајот ќе биде распределен кај нов судија, бидејќи судијата кој досега постапувал повеќе не е дел од Одделот за организиран криминал и корупција. Потврдениот дел од пресудата ќе биде предаден на судија за извршување на санкциите.
Веста ја пренесува Skopje1.mk
