На 60-годишна возраст, утрово ненадејно почина Арсим Зеколи, познат политички аналитичар и поранешен македонски дипломат. Веста за неговата смрт ја објави неговиот брат, д-р Шефкет Зеколи, на социјалните мрежи.
„Со неизмерна тага и болка, ве информираме дека денес, 8 јуни 2026 година, во раните утрински часови, почина нашиот брат, Арсим Сулејман Зеколи (1966-2026)“, соопшти семејството. Погребот ќе се одржи денеска во 18 часот на гробиштата во селото Блаце.
Зеколи беше поранешен амбасадор на Македонија при ОБСЕ во Виена и еден од најпознатите и најостри политички коментатори во јавниот простор. Како дипломат, беше постојан претставник на Македонија во Организацијата за безбедност и соработка во Европа, а неговото завршно обраќање од функцијата шеф на Постојаната мисија во 2009 година се уште се наоѓа во архивите на ОБСЕ.
По завршувањето на дипломатската кариера, Зеколи продолжи активно да ја следи политичката сцена, објавувајќи колумни, анализи и коментари кои често беа остри и критички кон политичките центри на моќ, без оглед на партиската припадност. Јавното мислење го памети по неговиот полемички и директен стил, со кој поврзуваше домашни политички случувања со регионалните и меѓународните процеси.
Тој редовно анализираше состојбата на демократијата, меѓуетничките односи, корупцијата, влијанијата од соседните земји и улогата на големите сили на Балканот. Неговите критички ставови често предизвикуваа реакции – од поддршка до остро несогласување – што го правеше еден од највлијателните и најконтроверзни гласови на јавната сцена.
Арсим Зеколи припаѓаше на генерацијата која ја преживеа транзицијата, дипломатските предизвици, конфликтните периоди и евроатлантските интеграции. Но, тој никогаш не беше само набљудувач. Јавната сцена ја користеше како алатка за предупредување, анализа и критика на политичките процеси.
Со неговата смрт, Македонија губи еден од најгласните и најнепопустливите аналитички гласови – човек кој ретко зборуваше за да биде удобен, а често изнесуваше ставови што отвораа расправа и бараа одговор.
Веста ја пренесува Слободен печат.
