Неверојатна приказна за преживување доаѓа од највисокиот врв во светот. Непалскиот планински водич Дава Шерпа, кој беше сметан за исчезнат и загинат на Монт Еверест, е пронајден жив по шест дена поминати во екстремни услови на планината.
Во разговор за Би-Би-Си, Шерпа открил дека успеал да остане жив благодарение на неколку чоколадни плочки што ги пронашол во својот џеб, како и со џвакање и топење мраз за вода.
Тој исчезнал додека се спуштал од Еверест. Според неговото сведочење, не се изгубил, туку останал заробен на планината откако му се потрошиле резервите на кислород. Во меѓувреме, неговото семејство во Катманду веќе започнало подготовки за погреб, уверено дека нема шанси да преживее.
Спасувачките тимови го пронашле во близина на ледениот водопад Кумбу, каде што исцрпен се обидувал да стигне до базниот камп. Со хеликоптер бил префрлен во болница во Катманду, каде што лекарите лекуваат дехидрација, смрзнатини и повеќе скршеници.
„Бев убеден дека мојот крај е близу“, изјавил Шерпа, опишувајќи ги драматичните моменти на голема надморска височина.
Првите два дена поминале без никаква храна. Кога силите почнале да го напуштаат, единствениот начин да остане хидриран бил преку мразот што го џвакал. Подоцна открил неколку чоколадни плочки кои му дале дополнителна енергија за да продолжи да се бори за живот.
Ситуацијата станала уште покритична кога паднал во длабока ледена пукнатина. Според неговите зборови, таму останал околу два и пол дена без можност да најде излез.
Спасот дошол од неочекувана страна. Лавина натрупала доволно снег во пукнатината, создавајќи услови да се извлече на површината. Откако успеал да се ослободи, пронашол сигурносни јажиња и почнал внимателно да се спушта кон пониските делови на планината.
И покрај уште една лавина што се случила на неговата рута, Шерпа не се откажал. Продолжил да се движи и во текот на ноќта, сè додека не наишол на тим планинари кои работеле на собирање отпад од повисоките делови на Еверест. Тие му помогнале безбедно да стигне до базниот камп.
Веста дека е жив предизвика огромна радост и неверување кај неговото семејство, колегите и учесниците во експедицијата.
Пемба Шерпа, директор на компанијата „8K Expeditions“, која учествувала во потрагата, го нарече случајот „исклучително самоспасување“ и вистинско чудо.
Сопругата на Дава Шерпа изјавила дека целосно ја изгубила надежта откако била известена дека понатамошна спасувачка акција е невозможна.
„Кога повторно го видов, не можев да поверувам дека стои пред мене“, рекла таа.
Според податоците за сезоната на искачување, пет лица ги загубиле животите на Еверест оваа година. Од почетокот на водењето евиденција во 1920-тите, на највисокиот врв во светот животот го загубиле повеќе од 300 луѓе.
Веста ја пренесува A1on.mk
