Еден од најпрепознатливите симболи во Милано повторно е предмет на реставрација. Во познатата Галерија „Виторио Емануеле Втори“ започна обновување на мозаикот со бик, чии тестиси со години наназад се оштетуваат поради необичен туристички ритуал поврзан со среќа.
Според локалното верување, посетителите треба да застанат со петата на местото каде што се наоѓаат тестисите на бикот и потоа трипати да се завртат околу својата оска. Се смета дека овој обичај носи среќа и гарантира повторна посета на Милано.
Поради огромниот број туристи кои секојдневно ја практикуваат традицијата, на мозаикот со текот на времето се појавила значителна вдлабнатина. Најмногу се оштетени розовите камени плочки кои го сочинуваат тој дел од уметничкото дело.
Мозаикот, изработен во сини, беж и розови нијанси, претставува исправен бик и е дел од историската декорација на галеријата. Бикот е симбол на градот Торино, првата престолнина на обединета Италија.
Во моментов, просторот околу мозаикот е ограден, а реставраторскиот тим работи на враќање на неговиот автентичен изглед. Реставраторот Џанлука Гали внимателно изработува и поставува нови камени елементи за да ги замени оштетените делови.
Иако ритуалот е омилен меѓу туристите, Гали смета дека неговите последици не се занемарливи.
„Можеби станува збор за симпатична традиција, но таа предизвикува реална штета на уметничкото дело“, изјави тој.
Од градската управа потсетуваат дека последната реставрација била спроведена во 2017 година. Според нив, галеријата е жив споменик кој постојано се користи и посетува, а токму големата популарност придонесува за нејзиното постепено трошење.
Веста ја пренесува Слободен печат.
