Скопјанката Александра преку објава на социјалните мрежи алармираше за вознемирувачки инцидент на семејно насилство кој, како што тврди, се случил во текот на денот на една скопска улица.
Според нејзиното сведоштво, маж физички ја нападнал жената, удирајќи ја и давејќи ја пред очите на случајни минувачи. Во обид да ѝ помогне на жртвата, реагирала нејзината ќерка, која му побарала на насилникот веднаш да престане.
„Ќерка ми се обиде да застане во одбрана на жената и му рече да престане со насилството. Со него беше уште едно лице, кое ѝ возврати дека не треба да се меша бидејќи станувало збор за неговата сопруга“, раскажува Александра.
Таа додава дека девојката му одговорила оти никој нема право да крене рака врз жена, без разлика на нивниот однос. По ова, агресивниот маж почнал да упатува закани и кон неа.
Најголемо разочарување, според Александра, е фактот што голем број минувачи останале неми сведоци на настанот и не се обиделе да ѝ помогнат на нападнатата жена.
Од Министерството за внатрешни работи потврдија дека случајот е официјално пријавен. Според информациите од полицијата, околу 11:30 часот такси возач од Велес пријавил дека додека превезувал две лица низ Скопје, мажот најпрво вербално, а потоа и физички ја нападнал жената која била со него.
Од МВР информираат дека се преземаат сите неопходни мерки за пронаоѓање на инволвираните лица и за целосно расветлување на случајот.
Веста ја пренесува Skopje1.mk
