Осудениот поранешен премиер Никола Груевски, кој веќе осум години живее во Унгарија, и понатаму остварува приходи преку својата приватна консултантска компанија, покажуваат официјалните финансиски извештаи објавени од унгарскиот портал „444“.
Фирмата „I.C.I.C Kft“, основана во 2021 година и специјализирана за деловно советување, функционира без вработени, но сепак редовно остварува добивка. Според објавените податоци, во 2025 година приходите на компанијата изнесувале околу 9.600 евра, додека во 2024 година изнесувале околу 11.600 евра. Со оглед на ниските трошоци, поголемиот дел од приходите се претвориле во профит – околу 5.650 евра во 2025 година.
Од основањето на компанијата до денес, Груевски преку дивиденди повлекол околу 45.800 евра. Последната добивка, за разлика од претходната година кога подигнал 2 милиони форинти, останала во фирмата како акумулирана добивка. Вкупната исплатена дивиденда од 2021 година изнесува околу 16,2 милиони форинти, односно приближно 45.760 евра.
Годишниот извештај открива и зголемување на средствата на банкарската сметка на фирмата – од 8 на 9 милиони форинти, како и раст на обврските од 2,5 на 3,3 милиони форинти до крајот на 2025 година.
Медиумот истакнува дека Груевски продолжува да повлекува дивиденди, додека дел од заработката останува како акумулирана добивка во компанијата. Сепак, не е познато кои се клиентите и со кои субјекти соработува фирмата.
Во објавените анализи се потсетува и на блиските односи на Груевски со поранешниот унгарски премиер Виктор Орбан и поранешниот министер за надворешни работи Петер Сијарто, при што се наведува дека поранешниот македонски премиер бил консултиран за политичките состојби на Западен Балкан.
Од Министерството за правда на Северна Македонија истакнаа дека правниот статус на Груевски останува непроменет и дека надлежните институции постапуваат согласно домашното и меѓународното право.
Веста ја пренесува Expres.mk
