Јон Фрчкоски соопшти дека партијата СДСМ привремено ги блокирала коментарите на социјалните мрежи. Причината, според него, се масовни и координирани напади од профили кои се поврзуваат со ВМРО-ДПМНЕ.
Фрчкоски објасни дека се формираат голем број лажни профили кои работат во групи и систематски шират навреди, лажни информации и говор на омраза.
„Работат како во смени, како во фабрика. Еден ден напаѓаат еден профил, наредниот ден друг“, рече тој.
Според Фрчкоски, цел на овие напади се сите кои зборуваат за реформи, корупција, криминал и тендерски афери, како и критичарите на премиерот Христијан Мицкоски и власта.
Тој додаде дека и самиот бил повеќепати цел на навреди, закани и повици за физичко насилство.
„Целта е да се создаде впечаток дека сите се против нас. Поради тоа привремено ги исклучивме коментарите“, изјави Фрчкоски.
Тој ги повика граѓаните да пријавуваат сомнителни профили, особено оние со мал број следбеници или фотографии преземени од интернет.
Фрчкоски најави дека коментарите ќе бидат повторно активирани кога ќе се создадат услови за конструктивна дискусија без лични навреди и токсична атмосфера.
Веста ја пренесува Skopje1.mk
