Култниот автомобил „Југо“, кој со години беше препознатлив симбол на поранешна Југославија, повторно се враќа во центарот на вниманието. По долг период на гласини и дигитални концепти што кружeа на интернет, новата верзија сега е претставена како концепт, а првиот функционален прототип се очекува во 2027 година.
Зад проектот стои српскиот претприемач и универзитетски професор д-р Александар Бјелиќ, додека дизајнерското решение го потпишува Дарко Марчета. Новото „Југо“ го задржува препознатливиот, аголен и едноставен дух на оригиналот, но добива модерна интерпретација со остри линии, LED светлосни елементи и поизразен ретро-футуристички стил.
Според досегашните најави, моделот ќе биде компактен градски хечбек со три врати. Во понудата се очекуваат бензински мотори и рачен менувач, а подоцна би можеле да се појават и хибридни, па дури и целосно електрични верзии. Целта е автомобилот да остане достапен, со планирана почетна цена од околу 12.000 евра.
Иако производителот сè уште не ја открива платформата на која ќе се базира возилото, автомобилските медиуми пренесуваат дека најверојатно ќе се користи веќе постоечка технолошка основа од друг производител, со цел да се намалат трошоците и да се исполнат современите безбедносни стандарди.
Светската премиера на концептот се одржа во Минхен, а првиот целосен прототип е најавен за EXPO Белград 2027.
Веста ја пренесува Skopje1.mk
