Украинскиот претседател Володимир Зеленски најави дека Украина ќе продолжи со операции насочени кон цели длабоко во руска територија, нагласувајќи дека Киев нема намера да го намали притисокот врз Москва.
Во своето вечерно обраќање, Зеленски истакна дека овие акции се дел од стратегијата со која Русија треба да ја почувствува цената на војната преку конкретни загуби. Според него, една од главните мети останува руската нафтена индустрија, со цел да се ослабат приходите што Москва ги добива од енергетскиот извоз.
Во изминатиот период украинскиот лидер повеќепати објавуваше снимки и фотографии од напади врз објекти на руска територија, нагласувајќи ја ефикасноста на украинските сили.
Од руска страна, властите обвинуваат дека во нападите има жртви меѓу цивилното население и штети врз цивилни објекти.
Москва ја обвини Украина и за нападот врз студентски дом во Старобелск, град во Луганскиот регион под руска контрола. Според последните информации, во нападот загинале 21 лице, меѓу кои и малолетни девојчиња.
Украинскиот Генералштаб, пак, соопшти дека целта на операцијата бил центар за управување со дронови.
По инцидентот, рускиот претседател Владимир Путин нареди одмазднички акции, а руските сили извршија масовни напади врз украинска територија. Во нападите, според руските извори, била употребена и балистичка ракета со среден дострел „Орешник“.
Во меѓувреме, руското Министерство за надворешни работи ги повика странските државјани да го напуштат Киев, предупредувајќи дека се можни нови удари врз објекти поврзани со украинската одбранбена индустрија.
Веста ја пренесува Курир.мк
