Фото: Принтскрин
Голема трагедија се случи синоќа на скопската обиколница кога возач на камион ја проби заштитната ограда, премина на спротивната страна и удри во автомобил, при што загинаа баритонот Ристе Велков, неговиот син и уште две лица.
Македонската јавност реагираше бурно по случајот кој ја потресе земјата, откако беше објавено од МВР дека возачот бил 76-годишник, па многумина од нив прашуваат зошто се издаваат дозволи на возрасни лица.
„Нека чува внуци, а не да вози камион… Што бара 76-годишник зад воланот? Кој ги издава лиценците на овие лица, наместо да уживаат во пензионерски денови, седнуваат зад волат…“, се само дел од реакции кои можеа да се забележат на социјалните мрежи.
Во продолжение следи и соопштението на МВР по трагедијата.
„На 21.05.2026 во 23:00 часот во СВР Скопје е пријавено дека на обиколница на Град Скопје, помеѓу надвозник Визбегово и клучка Мирковци, Б.Б.(76) од Косово, управувајќи товарно возило – влекач „ман“ со полуприколка со косовски национални ознаки, изгубил контрола над возилото и со него преминал преку металната ограда во спротивната насока на автопатот при што се судрил со патничко возило „бмв“ со скопски регистарски ознаки, управувано од Р.В.(51) од Скопје. Од сударот настанал пожар во двете возила од кој патничкото возило и кабината на влекачот целосно изгореле. Пожарот бил изгаснат од екипа на Бригадата за противпожарна заштита Скопје. Од здобиените повреди на местото на несреќата починал возачот Р.В. и сопатниците од неговото возило, А.В.(20) и П.М.(20) од Скопје и уште едно лице чиј идентитет засега е непознат. Лекар од Итна медицинска помош констатирал смрт, а по наредба на јавен обвинител телата на починатите се дадени на обдукција. Исто така, по наредба на јавен обвинител возачот Б.Б. е лишен од слобода и задржан во полициска станица. По целосно расчистување и документирање на случајот ќе биде поднесена соодветна пријава“, соопшти МВР.
