Министерот за внатрешни работи, Панче Тошковски, најави дека системот „Сејф сити“ ќе се прошири и ќе следи не само прекумерна брзина, туку и други сообраќајни прекршоци.
„Во моментов веќе детектираме различни прекршоци – не само брзо возење, туку и погрешно престројување, непрописно свртување и минување на црвено светло“, истакна Тошковски.
Тој додаде дека системот во иднина ќе биде надграден со можност за автоматско откривање на уште поголем број на прекршоци. Една од првите новини ќе биде санкционирањето на непрописно паркирање.
„Санкционирањето на погрешно паркирање ќе биде меѓу првите фази кои ќе се воведат“, посочи министерот.
Тошковски објасни дека во целиот процес ќе бидат вклучени повеќе институции, со цел внимателно и точно спроведување на казнувањата.
„Ова е комплексен прекршок и сакаме да избегнеме неправилности при санкционирањето. Затоа внимателно ги утврдуваме правилата“, рече Тошковски.
Првите локации за проширување на системот ќе бидат главните сообраќајници во Скопје, односно булеварите со најголем интензитет на сообраќај.
„Прво ќе започнеме со главните булевари во Скопје, каде што сообраќајот е најинтензивен“, додаде министерот.
Веста ја пренесува Skopje1mk.
