Министерот за внатрешни работи, Панче Тошковски, истакна дека неодамнешната кампања со билбордите во Скопје, на кои беше објавен телефонски број што не одговараше на повиците, ја постигнала планираната цел.
Кампањата, со слоганот „Како звучи неодговорно возење?“, предизвика интерес меѓу граѓаните, но повиците на бројот остануваа без одговор.
„Целта беше да биде впечатливо и вознемирувачко, и токму тоа го постигнавме“, рече Тошковски.
Министерот објасни дека идејата била луѓето директно да доживеат дел од реалноста со која секојдневно се соочуваат полицајците и медицинскиот персонал по сообраќајни несреќи.
„Она што за нашите полицајци и лекари е секојдневие по сообраќајна незгода, сакаме да стане момент кој ќе допре до секој граѓанин што ќе се јави на овој број и нема да добие одговор“, нагласи Тошковски.
Според него, кампањата веќе дала видливи резултати и наскоро ќе следува и нејзината втора фаза.
„Првата фаза на кампањата ја постигна целта. Подготовките за втората фаза веќе се во тек“, додаде министерот.
Тошковски истакна и податоци за намалување на бројот на жртви во сообраќајни несреќи.
„Во првите четири месеци од 2025 година, регистрирани се 47 жртви. Со иницијативи како оваа кампања и имплементацијата на ‘Сејф сити’, за истиот период во 2026 година бројот се намали на 26“, посочи Тошковски.
Тој додаде дека во Скопје, заклучно со април 2026 година, нема ниту една жртва од сообраќајни несреќи.
„До април оваа година, во Скопје нема жртви од сообраќајни несреќи“, заклучи министерот.
Веста ја пренесува Skopje1mk.
