Свеченото отворање на булеварот „Благоја Тоска“ во Тетово предизвика реакции во јавноста поради начинот на кој беше организиран настанот. Градоначалникот Билал Касами го пушти во употреба новиот булевар без присуство на претставници од македонскиот политички блок, а во самиот протокол изостанаа и државните симболи.
На настанот немаше функционери ниту од власта, ниту од опозицијата, иако станува збор за значаен инфраструктурен проект од поширок јавен интерес. Отсуството на претставници од ВМРО-ДПМНЕ дополнително отвори прашања за односите во рамки на владејачката коалиција, додека критики предизвика и фактот што не беа забележани македонското знаме и други државни обележја.
Дел од јавноста ваквиот пристап го оцени како политичка порака што создава впечаток на етничко дистанцирање, наместо заедничко институционално претставување и промоција на проект што треба да им служи на сите граѓани.
Веста ја пренесува Zboruvaj.mk
