Ученик кој вчера беше нападнат во основното училиште „25 Мај“ во Ченто се наоѓа во болница и според последните информации е во добра здравствена состојба, соопшти градоначалникот на Општина Гази Баба, Бобан Стефковски. Нападот го извршил поранешен ученик, а повредениот ученик е од деветто одделение.
„Со голема загриженост ја примив веста за немилиот настан во училиштето, каде поранешен ученик кој го завршил образованието минатата година, нападнал ученик од деветто одделение. Во разговорите со семејството на повредениот, добив информација дека детето е во стабилна состојба и прима соодветна болничка нега“, изјави Стефковски.
Напаѓачот е веднаш уапсен. Според полицијата, станува збор за 15-годишник кој со остар предмет влегол во училишниот простор и повредил ученик.
Градоначалникот осуди било какво насилство и потенцира дека тоа не може да се оправда со ништо.
„Општина Гази Баба ќе продолжи тесно да соработува со надлежните институции за целосно расчистување на случајот и преземање на потребните мерки“, додаде Стефковски.
Веста ја пренесува Makfax.mk
