Врховниот суд донесе одлука со која се отфрла барањето на бизнисменот Јордан Камчев за надомест од 1,5 милиони евра во граѓанската постапка поврзана со случајот „Рекет“. Судот оцени дека тој не може да се третира како оштетена страна.
Според информациите објавени од Призма.мк, петчлениот судечки совет утврдил дека не постои правна основа Камчев да ги побарува средствата што ги дал, и покрај тоа што преку својот адвокат Александар Михајловски поднел барање за ревизија на претходните одлуки со кои тужбата му била одбиена.
Во 2022 година, Камчев поднесе тужба против Катица Јанева, Бојан Јовановски, Зоран Милевски и поранешното Специјално јавно обвинителство, барајќи враќање на парите за кои тврдеше дека биле дадени како рекет. Подоцна, тој се повлече од постапката против Милевски.
Во образложението, судот наведува дека тужителот влегол во, како што се посочува, „морално недозволен договор“ со тужените, со цел да си ја подобри позицијата во предметот „Империја“, па затоа нема право на обештетување.
Во пресудата се потенцира дека кога двете страни постапуваат несовесно, ниту една нема право да бара враќање на даденото.
Судот исто така оценил дека со исплатата на средствата Камчев сторил кривично дело поврзано со незаконито влијание, нагласувајќи дека евентуално обештетување би го довело во прашање интегритетот на правосудниот систем.
Дополнително, утврдено е дека дел од побарувањето, кое се однесува на околу 500 илјади евра наводно дадени на Јовановски, не е поткрепено со соодветни докази. Воедно, судот констатирал дека Камчев не бил директен сведок за наводната исплата кон Јанева.
Со одлуката, Камчев е задолжен да ѝ надомести на Јанева 52 илјади денари за трошоци поврзани со постапката по ревизијата.
Оваа пресуда ја потврдува и претходната одлука на Граѓанскиот суд, донесена од судијата Андреј Димовски.
Веста ја пренесува Skopje1mk.
