На социјалните мрежи се појави снимка на која се гледа млада девојка како се искачува на заштитната ограда во делот каде што се сместени мајмуните во скопската зоолошка градина.
Во видеото се забележува како вработена од зоолошката градина реагира брзо и ја фаќа девојката за рака, настојувајќи да ја симне од местото на кое се качила, со цел да се спречи можен инцидент и да се избегне вознемирување на животните.
Авторот на објавата на социјалните мрежи упатува критика за, како што вели, честото игнорирање на правилата од страна на посетителите.
„И покрај јасно поставените предупредувања и табли дека животните не треба да се хранат ниту да се вознемируваат, во ЗОО Скопје постојано се случуваат прекршувања на правилата од посетителите.
Очигледно е дека недостига култура и едукација, но и поголемо присуство на редари, видеонадзор и соодветни санкции за оние што не ги почитуваат прописите.
Родители, наставници, професори и медиуми – неопходна е поголема едукација“, се наведува во објавата на Стефан Кирков.
Веста ја пренесува Infomax.mk
