Во текот на изминатата ноќ е извршен сериозен вандалски напад врз основното училиште „Ванчо Прќе“ во Штип, поради што утринава наставата беше прекината за повеќе од 1.100 ученици од прво до деветто одделение.
На официјалниот Фејсбук-профил на училиштето беше објавено известување до родителите дека денес нема да се одвива настава, со образложение дека причините се оправдани.
Според првичните информации, причинетата материјална штета е значителна. Во училиштето во моментов работат полициски екипи кои спроведуваат увид и истрага. Од надлежните институции информираат дека повеќе детали се очекуваат во текот на денот.
Директорот Кокан Радев изјави дека се оштетени смарт-табли, училишни табли, компјутери и друг инвентар. Според неговите зборови, сторителот користел спреј и остар предмет за да предизвика штета, а по ѕидовите биле испишани и навредливи и недолични пораки.
Веста ја пренесува 24chasa.mk
