Објава на социјалните мрежи предизвика бурни реакции во јавноста, откако граѓанка сподели вознемирувачко искуство од Градските гробишта Бутел. Таа тврди дека наишла на несоодветно третирање на човечки останки, што предизвикало шок и вознемиреност кај неа и нејзиното семејство.
Амела Мемиш Апостоловска на својот Фејсбук профил опишува дека на вториот ден од Велигден, додека со своите деца го посетувала гробот на нејзиниот татко, забележале бела вреќа оставена директно на патеката помеѓу гробните места.
Според нејзиното сведоштво, едно од децата се сопнало од вреќата, по што тие првично помислиле дека се работи за отпад или градежен материјал. Потоа се обиделе да ја тргнат настрана, сè уште несвесни за содржината.
Таа дополнува дека во близина забележале и свежо ископан гроб без никакво обележје, со видливи оштетувања, што според неа упатува на можна ексхумација по истекување на законскиот рок за користење на гробното место.
Апостоловска истакнува дека, дури и во случаи на ексхумација, законските прописи предвидуваат почитување на достоинството и соодветно постапување со посмртните останки, а не нивно оставање на отворен простор достапен за посетителите на гробиштата.
Веста ја пренесува Infomax.mk
