Американската амбасада во Тирана издаде сериозно предупредување за потенцијални безбедносни закани на територијата на Албанија. Според нивните информации, постои ризик од напади организирани од групи кои се поврзуваат со Иран, а можни цели би можеле да бидат објекти поврзани со Соединетите Американски Држави, како и припадници на иранската опозиција.
Во објавата се нагласува дека опасноста не е ограничена само на одредени институции, туку дека потенцијални мети може да бидат и јавни простори. Меѓу нив се наведуваат туристички атракции, трговски центри, хотели, ноќни клубови и ресторани.
Амбасадата ги повика американските државјани да бидат особено внимателни, да ги следат локалните медиуми и да внимаваат на својата околина. Дополнително, им се препорачува да ги ревидираат своите лични безбедносни планови и да бидат подготвени за брза реакција во случај на итност.
Во предупредувањето се истакнува и практичен совет: мобилните телефони секогаш да бидат наполнети и при рака, со цел навремена комуникација доколку дојде до кризна ситуација.
Инаку, во Албанија моментално престојуваат околу 3.000 членови на иранската опозициска организација МЕК, кои се сместени во камп во Манзе, во близина на Тирана.
Веста ја пренесува Informer.rs
