Политичкиот скандал што со недели ја потресува Црна Гора повторно се најде во центарот на вниманието, откако на социјалните мрежи се појавија нови експлицитни видео-снимки поврзани со поранешната државна секретарка во Министерството за човекови и малцински права, Мирјана Пајковиќ.
Аферата првпат одекна кон крајот на јануари, кога во јавноста излегоа информации за наводна интимна врска меѓу Пајковиќ и Дејан Вукшиќ, поранешен директор на Агенцијата за национална безбедност (АНБ) и некогашен советник на претседателот Јаков Милатовиќ. Во тој период на интернет почнаа да се шират снимки од нивни приватни средби, по што следуваа меѓусебни обвинувања и тврдења дека аферата е намерно подметната.
Откако скандалот привремено стивна, на интернет повторно се појавија нови видеа на кои, како што тврдат корисниците на социјалните мрежи, се гледа Пајковиќ во друштво на друг маж.
Видеата брзо се проширија онлајн и предизвикаа лавина реакции, а најголемо внимание привлече идентитетот на мажот што се појавува на снимките. На интернет се појавија шпекулации дека станува збор за лице поврзано со криминални кругови, но за таквите тврдења засега нема официјална потврда.
Дополнителен интерес предизвикува и начинот на кој е направено видеото. Според дел од коментарите на социјалните мрежи, снимката очигледно е направена од трето лице, што отвора прашања околу тоа како и под кои околности настанал материјалот, пишува informer.rs.
Скандалот продолжува да ја бранува јавноста во Црна Гора, додека во јавноста сè уште нема официјални информации за можни истраги или постапки поврзани со случајот.
