Вистинска драма се одвивала вчера попладне во Македонска Каменица, кога избувнал пожар во семејна куќа на улицата „14 Јуни“, а сопственикот останал заглавен на терасата на вториот кат.
Според информациите од Министерство за внатрешни работи, на 15 февруари 2026 година во 13:23 часот во СВР Штип било пријавено дека гори куќа сопственост на 80-годишниот Љ.Ѓ.
Полициски службеници од СВР Штип – Полициско одделение Македонска Каменица веднаш излегле на терен. По пристигнувањето, го затекнале сопственикот заглавен на терасата, опкружен со чад и пламен. Со брза и координирана интервенција, користејќи скали, успеале безбедно да го симнат и евакуираат.
На лицето му била укажана медицинска помош во Клиничката болница во Штип поради вдишување чад, по што бил пренесен во Комплексот клиники „Мајка Тереза“ во Скопје за понатамошно лекување.
Пожарот бил изгаснат од страна на Територијалната противпожарна единица Македонска Каменица, а надлежните извршиле увид за утврдување на причините за настанот.
Благодарение на навремената реакција на службите, избегната е поголема трагедија.
